काठमाण्डाै – उपचुनाव भइरहेकाे इलाम निर्वाचन क्षेत्र नम्बर २ मा दिउँसाे साढे २ बजेसम्ममा ५१ प्रतिशत मत खसेको छ । इलामको निर्वाचन क्षेत्र नम्बर २ मा १ लाख १५ हजार ८ सय ८७ मतदाता सङ्ख्या रहेको छ । १ सय ४९ मतदान केन्द्रमा शान्तिपूर्ण रूपमा मतदान भइरहेको निर्वाचन कार्यालयले जनाएको छ ।
बिहान सुस्त गतिमा मत खसेकोमा दिउँसो मतदाताकाे चाप बढेको इलामका प्रमुख जिल्ला अधिकारी इन्द्रदेव यादवले जानकारी दिनुभयो । ६ वटा पालिकाका ४२ वडामा मतदान भइरहेको छ । प्रतिनिधि सभा अन्तर्गत एमालेका सांसद सुवास नेम्वाङको निधन भएपछि इलाम–२ मा उपचुनाव भइरहेको हो ।
यस्तै बझाङको क्षेत्र नम्बर १ को प्रदेश सभा (क) मा दिउँसो भएपछि मतदान गर्नेको सङ्ख्या बढेको छ । बिहान ११ बजेसम्म १५ प्रतिशत मात्रै मतदान भएकोमा दिउँसो साढे १ बजेसम्म ३७ प्रतिशत मत खसेकाे सुदूरपश्चिम प्रदेश निर्वाचन कार्यालय धनगढीका निमित्त प्रमुख प्रेमराज भट्टले बताउनुभयो । खेतबारीको काम गरेर, खाना खाएर ठूलो सङ्ख्यामा मतदाता मतदान क्षेत्रमा आउन थालेका उहाँले बताउनुभयो ।
बझाङको क्षेत्र नम्बर १ को प्रदेश सभा (क) मा ६१ हजार ७४८ मतदाता छन् । ७४ वटै मतदानस्थल र ९३ मतदान केन्द्रमा मतदान शान्तिपूर्ण रूपमा भइरहेको छ ।
यसअघि नेपाली कांग्रेसका प्रदेश सभा सदस्य पृथ्वीबहादुर सिंहको गाडी दुर्घटनामा ज्यान गएपछि त्यहाँ उपचुनाव भइरहेको हो । बिहान ७ बजेदेखि शुरु भएको मतदान बेलुका ५ बजेसम्म चल्नेछ ।
