महोत्तरी – नेकपा माओवादी केन्द्रका अध्यक्ष पुष्पकमल दाहाल प्रचण्डले गठबन्धनभित्र आफू बलियो भएको बताउनुभएको छ । महोत्तरीको रामगोपालपुर नगरपालिकाको सभालाई सम्बोधन गर्दै अध्यक्ष दाहालले आफू प्रधानमन्त्री नबने पनि आफूले प्रधानमन्त्री बनाएको बताउनुभयो ।
कार्यक्रममा बोल्दै उहाँले पूर्वप्रधानमन्त्री तथा नेकपा एमालेका अध्यक्ष केपी शर्मा ओली समूह मधेश र राष्ट्रविरोधी भएको अरोप लगाउनुभएको छ । देशभित्र र बाहिरबाट ठूलो सेटिङ भएको बताउँदै अध्यक्ष दाहालले आफूलाई बादशाह ठानेका ओलीलाई आफूहरूले सडक आन्दोलनबाट बालकोट पुर्याएको बताउनुभयो ।
सेटिङ ठूलै थियो, देशभित्र र बाहिरको सेटिङ भएको थियो तर सडकमा आन्दोलनको लहर चलेपछि प्रतिगामी झुक्यो, उहाँले भन्नुभयो, आफूलाई बादशाह ठानेका केपी ओलीलाई बालकोट पुर्याइयो । मधेशी नागरिकको पहिचान तथा सबै जाति र वर्गको अधिकारका लागि आफ्नो पार्टी लडिरहेकाले मधेशमा माओवादी नम्बर एक पार्टी बन्ने दाबी पनि दाहालले गर्नुभयो ।
